२०७८ मङ्सिर १९ गते आइतवार
२०७८ मङ्सिर १९ गते आइतवार

प्यूठानमा भोलिदेखि भदौ १८ गतेसम्म लकडाउन

प्युठान : समुदायस्तरमा कोरोना भाइरसको सङ्क्रमण बढेको भन्दै प्यूठानमा आज राति १२ बजेदेखि लागू हुने गरी एक हप्ता लकडाउन हुने भएको छ।

जिल्ला कोभिड सङ्कट व्यवस्थापन समिति (डिसिसिएमसी) को बिहीबार बिहान बसेको बैठकले भोलिदेखि भदौ १८ गते राति १२ बजे सम्मका लागि जिल्लाभर पूर्ण बन्दाबन्दी गर्ने निर्णय गरेको हो ।

यो अवधिमा एम्बुलेन्स, प्रेस, दूधका गाडीबाहेक सबै यातायातका साधन बन्द रहनेछन् । बन्द अवधिमा अत्यावश्यक खाद्यान्न पसल, तरकारी पसल र डेरी बिहान ७ बजेदेखि ९ बजेसम्म र बेलुका ५ बजेदेखि ७ बजेसम्म खोल्न दिने निर्णय गरिएको प्रमुख जिल्ला अधिकारी खिमराज भुसालले जानकारी दिए ।

सङ्क्रमित समुदायमा हेलमेल भएका र समुदायमा कोरोना सङ्क्रमणको जोखिम उच्च बनेको भन्दै उनीहरूको कन्ट्याक्ट ट्रेसिङ गरिने भुसालले बताए ।

एक हप्ताका लागि अत्यावश्यक पसलबाहेक सबै बन्द गर्ने निर्णय गरिएको जिल्ला प्रशासन कार्यालय प्यूठानले जनाएको छ ।