८ वर्षे बालकको ढुंगाले हानेर हत्या

अछाममा एक बालकको हत्या भएको छ। साँफेबगर नगरपालिका वडा नम्बर ९ बुढाकोटमा ढुंगाले हानेर ८ वर्षका हिमाल विकको हत्या भएको प्रहरीले जनाएको छ।

हत्या आरोपमा सोही ठाउँका गणेश सुनारलाई पक्राउ परेको जिल्ला प्रहरी कार्यालय अछामका डिएसपी योगेन्द्रबहादुर थापाले जानकारी दिएका छन्। वडा अध्यक्ष धन बहादुर थापाले पक्राउ परेका सुनारले पहिले पनि गाउँका मान्छेलाई कुटपिट गर्ने गरेको बताए।

शनिबार दिउसो २ बजे उनी छोरासँगै घरबाट बाहिर निस्केका थिए। बाटोमा ती बालकसँग भेटभएर बोलचाल भएपछि उनले ढुंगाले हानेर हत्या गरेको खवर साथमा रहेका छोराले घरमा आमालाई सुनाएका थिए।

पछि घटनास्थलमा पुग्दा बालक घाइते अवस्थामा थिए। उनलाई उपचारका लागि स्वास्थ्य चौकी लैजाने तयारी गर्दागर्दै मृत्यु भएको वडा अध्यक्ष थापाले बताए।