२०७७ मङ्सिर ८ गते सोमवार
२०७७ मङ्सिर ८ गते सोमवार

अफगानिस्तानको काबुलमा रकेट प्रहार हुँदा ८ जनाको मृत्यु

अफगानिस्तानको राजधानी काबुलमा रकेट प्रहार हुँदा कम्तीमा पनि आठ जनाको मृत्यु भएको छ। शनिबार बिहान कार्यालय समयमा काबुलको वस्तीमा थुप्रै रकेटहरू प्रहार भएका थिए।

रोयटर्सका अनुसार त्यसमा परी कम्तीमा पनि आठ जना नागरिकको मृत्यु भएको र ३१ जना घाइते भएका छन्।

आन्तरिक मन्त्रालयका प्रवक्ता तरिक अरियनले पनि सो संख्या पुष्टि गरेका छन्। स्वास्थ्य मन्त्रालयका अनुसार ५ जनाको शव र २१ जनालाई अस्पताल लगिसकेको छ।

आतंककारीहरूले १४ वटा रकेटहरू सानो ट्रकमा हालेर प्रहार गरेको प्रवक्ता अरियनले बताए। त्यस्तै ट्रक शहरमा कसरी पसेको बारे पनि अनुसन्धान भइरहेको उनले जानकारी दिए।

केही स्थानियले भने रकेट प्रहार गरेको भिडिओहरू समेत खिचेका छन्। ती भिडिओहरू खिचेर उनीहरूले सामाजिक सञ्जालमा हालेका छन्। आक्रमणपछिका तस्विर तथा भिडिओहरू पनि सार्वजनिक भएका छन्। ती तस्विरमा कारहरू बिग्रिएका, घरहरू भत्किएको झ्यालहरू फुटेको देखिन्छ।

एक रकेट भने काबुलस्थित इरानी दूतावास परिसरमा पनि लागेको थियो। दूतावासले यस सम्बन्धी विज्ञप्ती जारी गर्दै कुनै मानविय क्षति नभएको बताएको छ। तालिबानले यस आक्रमणमा आफ्नो कुनै संलग्नता नभएको बताएको छ।

पछिल्लो समयमा ५ लाख जनसंख्या रहेको काबुलमा तालिबान र अरू अतिवादी समुहहरूबाट आक्रमण हुने क्रम बढ्न थालेको छ।