कोरोना अस्पतालमा संक्रमित पुरुषले गरे आत्महत्या

सांकेतिक तस्वीर ।

रुपन्देहीका एकजना कोरोना संक्रमितले अस्पतालमा आत्महत्या गरेका छन् । सैनामैना नगरपालिका–१ वनकट्टामा नगरपालिकाले सञ्चालन गरेको कोरोना अस्थायी अस्पतालमा भर्ना भएका सैनामैनाको रानिबगियाका ४० वर्षीय पुरुषले शनिबार बिहान शौचालयमा आत्महत्या गरेका हुन् ।

वैशाख १६ गते कोरोना पोजेटिभ देखिएपछि उनी सोही दिन अस्पताल भर्ना भएका थिए । उनको स्वास्थ्य अवस्था सामान्य रहेकामा शनिबार बिहान ४ बजे शौचालय जाने बहानामा झुण्डिएर आत्महत्या गरेका अस्पतालका स्वास्थ्यकर्मी दीपक पाण्डेले जानकारी दिनुभयो।

यसअघि बाँकेको बैजनाथमा पनि होमआइसोलेसनमा बसेका संक्रमितले आत्महत्या गरेका थिए ।