शान्तिनगरले होम आइसोलेसनमा बसेका संक्रमितको घरमै गएर जानकारी लिदैं

शान्तिनगर गाउँपालिकाले विभिन्न वडामा कोरोना संक्रमणका कारण होम आइसोलेसनमा बसेका संक्रमित विरामीको घरमै गएर स्वास्थ्य अवस्थाको बारेमा जानकारी लिने कार्य सुरु गरको छ । शान्तिनगर गाउँपालिकाले असामान्य भएका संक्रमित विरामीलाई धनौरी स्वास्थ्य चौकीको आइसोलेसनमा राखेको छ भने सामान्य अवस्थामा रहेका संक्रमितलाई स्वास्थ्यकर्मीको परामर्श र औषधी दिएर होम आइसोलेसनमा राखेको छ ।

जनप्रतिनिधि र स्वास्थ्यकर्मी टोली घरमै पुगेर होम आइसोलेसनमा बसेकाहरुको स्वास्थ्य अवस्थाको बारेमा जानकारी लिने कार्य सुरु गरेको शान्तिनगर गाउँपालिका प्रवक्ता रबि बुढाथाकीले जानकारी दिनुभयो । घरमै पुगेर संक्रमितको स्वास्थ्य अवस्थाको जानकारी, आवश्यक परामर्श र हौसला प्रदान गर्ने उद्येश्यले यस्तो कार्य सुरु गरेको प्रवक्ता बुढाथोकीले बताउनुभयो । यसले गर्दा संक्रमितको स्वास्थ्य अवस्थाको बारेमा जानकारी हुने र संक्रमितको आत्मावल बढ्ने प्रवक्ता बुढाथोकीको भनाई छ । यो कार्य हिजो सोमबार वडा नं. ६ बाट सुरु गरिएको हो ।

शान्तिनगर गाउँपालिकामा हाल ६१ जना संक्रिय कोरोना संक्रमित रहेका छन् । ६१ जना संक्रिय कोरोना संक्रमित मध्ये ५३ जना होम आइसोलेसनमा बसेको स्वास्थ्य शाखा संयोजक हरी पुनले जानकारी दिनुभयो । संयोजक पुनका अनुसार ४ जनाको धनौरी स्वास्थ्य चौकीको आइसोलेसनमा उपचार भइरहेको छ भने २ कोरोना विशेष अस्पताल बेलझुण्डि, १ जनाको नेपालगञ्ज र १ जनाको भैरवाको अस्पतालमा उपचार भइरहेको छ ।

शान्तिनगर गाउँपालिकामा हाल तुलनात्मक रुपमा कोरोना संक्रमितको संख्या घट्दै गएको छ । पहिले एन्टिजेन विधिबाट परिक्षण गर्दा अधिकांशको रिपोर्ट पोजेटिभ आउने गरेमा अहिले भने अधिकांशको रिपोर्ट नेजेटिभ आउने गरेको संयोजक पुनले बताउनुभयो ।

साथै शान्तिनगर गाउँपलिका भित्र होम आईसोलेशनमा रहेका सबै सक्रिय संक्रमितहरूले कुनै समस्या भएमा चिकित्सक संग सम्पर्क गर्न अनुरोध गरिएको छ । कुनै समस्या भएमा स्वास्थ्य संयोजक हरि पुनको नम्बर ९८६६७०८५२५ र मेडिकल अधिकृत डा. केशब के.सीको नं. ९८४१४४००२१ मा सम्पर्क गर्न सकिने बताइएको छ ।