बाढीपहिरोमा परी हालसम्म ३८ को मृत्यु, ३१ जना बेपत्ता

असारको पहिलो साताबाट शुरू भएको वर्षाका कारण हालसम्म ३८ जनाको मृत्यु भएको छ भने ३१ जना बेपत्ता भएका छन् । बाढी र पहिरोमा परी ३९ जना घाइते भएका छन् ।

अविरल वर्षाका कारण ४८ जिल्ला पूर्णरूपमा प्रभावित भएका छन् । सोही अवधिमा चार सय ८९ घर पूर्णरूपमा भत्किएका छन् भने एक सय १२ घर आंशिकरूपमा भत्किएका छन् । गृह मन्त्रालयका अनुसार सबैभन्दा बढी मानवीय र भौतिक क्षति सिन्धुपाल्चोकमा भएको छ । त्यहाँ बाढी र पहिरोमा परी पाँचको मृत्यु भएको छ भने २० जना बेपत्ता भएका छन् । सिन्धुपाल्चोकमा तीन सय ३८ वटा घर पूर्णरूपमा क्षतिग्रस्त भएका छन् ।

अहिलेसम्म बाढी र पहिरोका दुई सय दुईवटा घटना भएका छन् भने मनाङमा आएको बाढीबाट ५९ घर पूर्णरूपमा क्षतिग्रस्त भएका छन् । गृह मन्त्रालयका प्रवक्ता जनकराज दाहालका अनुसार बाढी र पहिरोमा पारी ३६ वटा सरकारी भवन पनि पूर्णरूपमा ध्वस्त भएका छन् । यसका साथै बाढीले २२ वटा झोलुङ्गे पुल बगाएको छ भने १४ वटा पक्की पुल क्षतिग्रस्त भएका छन् । यो खबर नेपाल समाचारपत्र दैनिकमा छ ।