खुकुरी प्रहार गरी आफ्नै श्रीमतीको हत्या

पोखरामा एक पुरूषले खुकुरी प्रहार गरी आफ्नै श्रीमतीको हत्या गरेका छन् । अन्नपूर्ण गाउँपालिका–१ नौडाँडा घर भई पाेखरा –८ बगालेटोल बस्ने ४२ वर्षीय जहरसिंह कुँवरले बुधबार ४० वर्षीया श्रीमती राधिका कुँवरको घाटी र पेटमा खुकुरी प्रहार गरी हत्या गरेका हुन् ।

मध्याह्न १२ बजेतिर राधिका चिच्याएको आवाज आएपछि घरबेटी गएर हेर्दा जहरसिंहले श्रीमतीलाई खुकुरी प्रहार गरिरहेको देखेका थिए । घरबेटीले खबर गरेपछि तत्कालै वडा प्रहरी कार्यालय बैदामको टोलीले जहरसिंहलाई पक्राउ गरी राधिकालाई अस्पताल पुर्‍याएको थियो ।

पोखरा स्वास्थ्य विज्ञान प्रतिष्ठानमा उपचारको क्रममा चिकित्सकले १२:४४ बजे मृत घोषणा गरेको कास्की प्रहरी प्रवक्ता डीएसपी बसन्तकुमार शर्माले बताए । प्रहरीका अनुसार सामान्य विवाद भएपछि जहरसिंहले श्रीमतीलाई खुकुरी प्रहार गरेका थिए ।

जहरसिंहलाई खुकुरी सहित नियन्त्रणमा लिएर थप अनुसन्धान कार्य भइरहेको प्रहरीले जनाएको छ । उनीहरुको एक छोरा रहेका छन् ।