करिब १९ अर्ब रुपैयाँ बराबरको स्मार्टफोन आयात

चालु आर्थिक वर्षको सात महिना अर्थात साउनदेखि माघसम्म करिब १९ अर्ब रुपैयाँबराबरको स्मार्टफोन आयात भएको छ । भन्सार विभागले सार्वजनिक गरेको तथ्याङ्कअनुसार माघसम्म विभिन्न देशबाट १२ लाख २९ हजार थान स्मार्टफोन आयात गर्दा १८ अर्ब ९८ करोड रुपैयाँभन्दा बढी बाहिरिएको छ ।

गएको आर्थिक वर्षको यसै अवधिमा १७ अर्ब ३८ करोड रुपैयाँ बराबरको स्मार्टफोन आयात भएको थियो । सबैभन्दा धेरै स्मार्टफोन चीनबाट आयात भएको छ । चीनबाट ७ महिनामा झण्डै १३ अर्ब रुपैयाँ बराबरको ९ लाख ५३ हजार थान स्मार्टफोन आयात भएको भन्सार विभागको तथ्याङ्क छ ।

यस्तै भारतबाट ५ अर्ब ६२ करोड रुपैयाँ बराबरको २ लाख ७२ हजार थान स्मार्टफोन आयात भएको छ । स्मार्टफोन आयातबाट सरकारले सात महिनामा ३ अर्ब ५३ करोड ९७ लाख रुपैयाँ राजस्व सङ्कलन गरेको छ ।।